كيفية التعامل مع الزوج البخيل

صباح الخير يابنات النهارده هنتكلم فى موضوع شيق جدا اتمنى يارب يعجبكوا
طبعا كلنا عارفين ان البخل طبع بذئ جدا جدا وبسببه كتير اتفككت اسر وعاشت زوجات مآسى كبيره فمبدئيا كدا لكل بنت لسه مش متزوجه اختارى صح واختبرى الشخص الى هتكملى معاه باقى حياتك علشان متتعبيش بعد كدا دا بالنسبه للى لسه على البر طيب الستات الى تزوجوا وبعد الزواج اكتشفوا ان البخل طبع فى ازواجهم ايه الحل هنا

هنتكلم فى موضوعنا النهارده عن الزوج البخيل وعن كيفية التعامل معاه وعن طرق تقدرى بيها تاخدى الى انتى عايزاه بدون مشاكل وبدون ما تضطرى للانفصال
لو زوجك بخيل اول حاجه لازم تعمليها انك تتكلمى عن كرمه وخاصة ادام اهلك لان التحدث عن كرمه امام الاخرين هيخليه يحاول ديما يحافظ على الصوره دى ودا هيجبره انه يبذل قدر اكبر من المال مثلا فى لمه عائليه احكى لاهلك فى حضوره طبعا عن مدى كرمه معاكى ومع اولاده ومدى تقديرك لبذله المال من اجل اسعادكم ودا تأثيره هيكون ايجابى جدا عليه وبالتالى هينعكس عليكى

تانى حاجه تعمليها سعيا لبعض التغيير فى زوجك هى التحدث عن شخص اخر يكون فى مستواكم تقريبا بشأن صرفه على بيته واولاده وزوجته واد ايه هما سعداء بيه والناس بتثنى عليه لكرمه وكل دا لانه بس فهم ان المال ما هو الا وسيله لسد الاحتياجات اولا ثم الترفيه ثانيا وليس ابدا ابدا هدف يجب تحقيقه وحاولى تناقشديه بهدوء وبالمنطق

طيب تالت حاجه تعمليها علشان تقدرى توفرى لبيتك واولادك ولنفسك ايضا احتياجاتكم حطيه امام الامر الواقع بمعنى ايه اقولك انا بمعنى إيه
مثلا اطلبى منه تخرجوا تتمشوا شويه مجرد تمشيه ولا عشا بره ولا مصاريف وفى الطريق اطلبى منه يقف معاكى ادام فاترينه فيها فستان اطفال عجبك لبنتك مثلا وواحده واحده ادخلى المحل وقيسيه على البنت وبعدين قوليله ادام الموجودين خلاص هى هتاخده مش هتقلعه دا كانه معمول ليها  او مثلا المدرسه طلبت مصاريف العام الجديد اطلبى منه يروح لبنته يسأل على مستواها واكيد هناك هيطلبوا منه المصاريف فهيضطر يدفع وهكذا من الاخر المقصود بلاش تنبهيه لطلباتكم علشان هيتهرب افضل حطيه امام الامر الواقع

كمان مهم جدا انك تقنعيه بذكاء ان الى بتشتريه مفيش اقل منه فى السعر وان دا لان الدنيا غاليه اوى وحسسيه انك متضايقه من الغلاء بس ما باليد حيله لان دا اقل الموجود

كمان حاجه مهمه لما تنزلى تشترى حاجه خديه معاكى علشان يعرف الاسعار ويشوف بنفسه اد ايه الدنيا غاليه لان البخيل بطبعه ديما عنده شعور ان زوجته بتبزر فى ماله وبتسرف فيه فمفيش مانع انك تطمنيه

بردو من الحاجات المهمه انك لو معاه بتشتروا حاجه وسعرها غالى شويه تهاوديه يعنى لو لاقيته زهأان وبيتأفف من السعر انتى كمان اعملى زيه وقوليله معاك حق فعلا غاليه جدا ولاحظى اد ايه هيتقبل الاسعار اكثر من الاول

اذا حصل وجت لزوجك حالة كرم نادره بلاش تستغليها حاولى تستفيدى منها باعتدال علشان يطمن ويكررها تانى

لو صرف مبلغ كبير من المال وكان زعلان جدا بعدها او عصبى يبقى لازم تواسيه وتحاولى تتفهمى وضعه ومرضه لان البخيل فى النهايه شخص مريض بطبعه عافانا الله واياكم

حاولى ديما تحسسيه انك مقدره تعبه علشانكم ونفسك تساعديه باى شكل وانك بتحافظى على ماله بقدر الامكان تقديرا للمجهود الى بذله علشان يوفره ليكوا 

حسسيه بمدى سعادتك انتى واولادك لما بيشترى ليكم شئ وقوليله ان لولاه ما شعرتم بمثل هذا الشعور

خليكى كريمه معاه ومع اولادكم بشكل يثير غيرته علشان يحاول يعمل زيك مثلا

فهميه انك موافقه جدا انه يعمل حساب المستقبل وان دا شئ بيأكد على حبه ليكوا لكن مع ضرورة توفير الاحتياجات الحاليه بما يتناسب مع مستواه المادى طبعا
وفى النهايه القرار ليكى اما تتحمليه وتتقبلى طبعه واما تنفصلى عنه ودا قرارك طبعا

اتمنى اكون قدرت افيدكم النهارده واستنونى فى موضوع جديد مع ياسمين