لفة جلاش - مع ياسمين الجلاش بطريقه الاختراع

لفة جلاش - مع ياسمين الجلاش بطريقه الاختراع

لفة جلاش - مع ياسمين

مساء الورد عليكوا جميعا 

 اليوم مع ياسمين الموضوع مختلف وجديد ويارب ان شاء الله ينال اعجابكوا واكيد هتقولولى ايه رايكوا
زهقانه  من الفطار والعشا التقليدى ومحتاجه تغيير يكون بسيط وغير مكلف واولادك كمان يحبوه جدا جدا  ؟
عايزه تعملى حاجه حلوه وخايفه من المجهود والتكلفه الكتيير  ؟
مع ياسمين وبس هتلاقى الحل تابعونى فى موضوعنا النهارده وانتى مش بس هتغيرى وتجددى لا كمان انتى اكيد هتوفرى

 والاهم ان اولادك اكيد هيحبوا اكلك جدا ومش هيزهأوكى علشان يفطروا بالعكس هما الى هيطلبوا الفطار بنفسهم
النهارده كل الى محتاجينه علشان نعمل كذا حاجه هى بس لفة جلاش متهيألى سهله ومش مكلفه ،النهارده معايا وصفتين حلوين جدا جدا ومنتهى السهوله فى التحضير
اول وصفه معايا النهارده هى صوابع الجلاش بالجبنه وصفه سهله وبسيطه وطعمها وااااو
المكونات :

 نص لفة جلاش او اكتر حسب العدد
معلقتين كبار جبنه مطبوخه
معلقتين كبار جبنه فيتا
معلتين كبار موتزيرلا مبشوره
قطعه متوسطه جبنه شيدر
ومش لازم كل الانواع دى طبعا ممكن جدا تعمليها بنوع واحد بس فيتا مثلا او شيدر او مطبوخه زى ما تحبى وممكن كمان تحطى الموتزيريلا على اى نوع فيهم

الطريقه

وانتى بتفتحى لفة الجلاش اقسميها نصين بالعرض وبعدين قسميه شرايط بالطول هتكونى محضره نوع الجبنه الى هتستخدميه ممكن تضيفى عليه فلفل اخضر بيدى طعم تحفه جدا ونكهه مختلفه كمان او توابل وطبعا كل ست وافتكاستها بأه وابدأى حطى الحشو على طرف الشريط ولفيه وانتى بتلفيه اتنى الجوانب لجوه علشان الحشو ميخرجش بره الصوابع وتابعى نفس الخطوه مع تغيير نوع الجبنه وكل نوع ضيفيله حاجه مختلفه سواء فلفل او قطع صغيره طماطم او زعتر او توابل زى ما تحبى وزى ما اطفالك بيفضلوا طبعا هما الاساس
هتكونى مجهزه صاج الميكرويف ومدهون سمنه او زيت وبالفرشه ابداى امسحى صوابع الجلاش باللبن او الزباردى ايا كان المتوفر عندك ورصي الصوابع على الصاجه بمساحه كافيه بين كل صباع والتانى علشان لو حصل والحشو خرج الصوابع متشبكش فى بعض وبعدين سيحى حته سمنه صغيره وبنفس الفرشه ادهنى وش الصوابع بالسمنه وبعدين دخليها الفرن مدة نص ساعه فى درجة حراره متوسطه واكيد من وقت للتانى هتطمنى عليها علشان متحمرش زياده ،بعد حوالى مدة نص ساعه خرجيها من الفرن وغطيها وسيبها تبرد شويه وبعدين قدميها لوحدها او مع شيبسى ودوقى ومتنسيش تقوليلى رايك انا عن نفسى بنتى حبتها جدا جدا اه وممكن كمان تقدميها مع عصير ليمون بالنعناع او حاجه ساقعه لاولادك وبالهنا والشفاد:-( :-) :-) :-) :-)

لفة جلاش - مع ياسمين

الوصفه التانيه هى حاجه حلوه معظمنا بيحبها جدا وهى ام على بس بطريقه سهله اوى
المكونات

 هاتى نص لفه الجلاش التانيه

 وفى صاجه تانيه قطعيها قطع صغيره وسيحى معلقتين سمنه كبار على النار وبعدين ضيفيه كلها على قطع الجلاش وافضلى قلبى كويس لحد ما تتاكدى ان كل القطه عليها السمنه ومش لازقه فى بعضها وبعدين دخليها الفرن مدة عشر دقايق وطبعا مع تقليب مستمر كل كام دقيقه علشان كل القطع تاخد نفس اللون خلى لونها دهبى متوسط علشان تكون مقرمشه كويس وخرجى الصاجه تبرد بره الفرن

اثناء ما تبرد قطع الجلاش جهزى الحشو الى موجود عندك زبيب مثلا مع جوز هند وممكن سودانى او لا وقلبيهم على بعض كويس وبعدين افردى قطع الجلاش فى صينيه او فى كذا طاجن وضيفى المكسرات على الجلاش وقلبيها كويس مع بعض وابدأى جهزى اللبن
علشان تجهزى اللبن حطى نص كيلو لو نص لفة جلاش وكيلو لو لفه كامله على حسب العدد
حطى على اللبن مقدار سكر بحيث يكون مظبوط وضيفى كيس فانيليا كمان على الخليط دا وارفعيه يسخن ودا مهم جدا على النار ويسخن بس مش يغلى وبعدين ضيفيه على الصينيه ودخليها الفرن فى درجة حراره متوسطه مدة من نص ساعه لساعه الا ربع واطمنى عليها كل فتره طبعا
بعد لما اللبن كله يتشرب وتستوى والوش يحمر كويس اطفى الفرن وسيبها تهدى جواه شويه وبعين خرجيها وقطعيها وضيفى على الوش شوية مكسرات زبيب وجوز هند وسودانى ودوقى بأه احلى ام على بيتى بأقل تكلفه وبالف هنا وشفا يارب وانا واثقه انها هتعجب اطفالكم كمان

وبكدا النهارده خلص موضوعنا واتمنى يكون عجبكم وتجربوا الوصفات دى ومتنسوش تتابعوا كل جديد مع ياسمين