جربى وادعيلى - الاختراع

جربى وادعيلى - الاختراع

مع ياسمين

مساء الخير جميعا

 النهارده حبيت اغيرلكم شويه عن المواضيع الى فاتت  بموضوع ان شاء الله يعجبكم 

موضوعنا النهارده جميل ومختلف جدا وانا واثقه انه هتحبوه كتيييير
طبعا كلنا فى فصل الصيف لازم يكون عندنا عصاير فى التلاجه باستمرار علشان الحر والى بيعمله فينا وخاصة فى وجود اطفال
وطبعا كتير بنزهأ من تكرار نفس انواع العصير كل يوم وبنبقى نفسنا نجدد شويه كتغيير وكعامل جذب لاولادنا علشان يشربوا عصير بكميه كبيره 
النهارده هقولكوا وصفات جديده لمشروبات جربتها بنفسى وطلعت حلوه جدا جدا ومنعشه وبجد ميتشبعش منها ابدا والحمد لله بنتى كمان حبتها جدا وكمان زوجى بيطلبها بالاسم دلوقتى
خلينا نبدأ بعصير تحفه انا عن نفسى بعتبره من افضل العصاير المنعشه الى ممكن نحضرها فى فصل الصيف وهو

 الليمون بالنعناع
المكونات :

 حبتين ليمون
ورق نعناع اخضر او شربات نعناع فيتراك
سكر وتلج

الطريقه :

لو هتستخدمى ورق نعناع يبقى عودين ناخد ورقهم مع الليمون والسكر على لتر ميه والتلج ونضربهم فى الخلاط كويس وبعدين نصفى الخليط ونصبه فى كاسات بيكون لونه اخضر وطعمه روعه
اما لو هتستخدمى شربات نعناع فمعلقتين كبار من شربات النعناع  على لتر ميه وحبتين ليمون مع سكر وتلج وبردو نخلطهم كويس وبعدين نصفيهم ونصب فى كاسات  مش قادره اقولكم اد ايه حلو جدا العصير دا

وصفه تانيه 

جديده جدا وبردو تحفه  الليمون باللبن
المكونات : 4كوبيات لبن مغلى مسبقا او بخيره وطبعا يكون بارد و3 ليمونات وممكن اضافة ورقتين نعناع اولا حسب الرغبه وتلج وسكر

الطريقه 

بنضيف المكونات مع بعض فى الخلاط ونضربهم كويس جدا وبعدين نصفى الخليط ونصب فى الكاسات

الوصفه التالته مع ياسمين النهاره هى الاناناس بالبرتقال 
المكونات 

؛ عصير برتقالتين كبار
حبه اناناس مقطعه
سكر وتلج

الطريقه: 

نجهز عصير البرتقال الاول وبعدين نضيفه على لتر ميه ونضيف عليه الاناناس والسكر والتلج ونضربهم كويس ومش لازم نصفى الخليط ونصبه فى الكاسات

وطبعا المانجه والفراوله عصاير لاغنى عنها فى الصيف بس ممكن نعملها بطريقه جديده
نجيب حبات فراولة تكفى للتر ميه مع موزتين مع معلقه من عصير تانج اى نكهه وتلج وسكر ولاحظوا الفرق الرهيب فى الطعم
نفس الموضوع مع عصير المانجه
مانجه مع موزتين ومعلقه تانج وسكر وتلج على لتر ميه وبردو شوفوا اد ايه هيكون مختلف

نيجى بأه للقهوه وعشاق القهوه وانا اولكم طبعا  
معايا ليكوا وصفتين وااااااااو جربوهم وادعولى
الوصفه الاولى

 النسكافيه بالهوت شوكلت او الكاكاو

المكونات

 :كيس نسكافيه 2×1
كيس هوت شوكلت او معلتين صغيرين بودرة كاكاو
سكر حسب الرغبه

الطريقه :

 حطى مقدار فنجان لبن فى كنكه القهوه المتوسطه وبعدين ضيفى السكر حسب رغبتك وقلبيه مع الميه كويس وبعدين ضيفى كيس النسكافيه ونص كيس الهوت شوكلت او بودرة الكاكاو وقلبى كويس وبعدين سيبى الخليط يغلى دقيقه وصبيه فى فنجان ودوقى احلى نسكافيه وطبعا ممكن تبدلى اللبن بالميه عادى حسب الرغبه

الوصفه التانيه:النسكافيه بالكارميل
المكونات 

: كيس كراميل جاهز
كيس نسكافيه
فنجان لبن
سكر حسب الرغبه

الطريقه :

حطى اللبن على النار وقلبى فيه السكر حسب ما تحبى وبعدين ضيفى الكراميل وقلبى كويس على نار هاديه وبعدين حطى النسكافيه وقلبى كويس وبعدين سيبى الخليط يغلى على نار هاديه مدة دقيقه  وبعدين صبيه فى فنجان ودوقى بأه وادعيلى بجد تحفه وبردو ممكن جدا تبدلى اللبن بالميه حسب الرغبه 
كدا وصفات النهارده كلها خلصت وياارب تكون عجبتكوا واكيد مستنيه ارائكوا وانتوا كمان استنوا منى كل جديد مع ياسمين وبس