ماسك الشفايف

ماسك الشفايف

الموضوع بتاعنا النهارده مهم جدا لكل بنت وست وهو عن الشفايف ومشاكلها وازاى نقدر نعالجها بمواد طبيعيه وبطرق سهله

 وغير مكلفه بالمره خلينا نبدأ مع بعض

  العوامل الى بتتسبب فى مشاكل الشفايف من غمقان وجفاف وتشققات وبهتان وغيره وغيره وياريت طبعا نحاول نتجنبها علشان نحصل على شفاه صحيه

اول سبب عندنا هو التعرض الكتيير لاشعة الشمس ودا بيدى للشفايف لون داكن غير مستحب ابدا
تانى خطأ ودا معظمنا بيقع فيه هو الاستخدام المفرط للروجات وملونات الشفاه ودا بيؤدى للون الداكن ولجفاف الشفاه وتشققات كمان احيانا
من الاسباب المهمه بردو الافراط فى شرب القهوه والشاى فياريت نحاول نقلل من دا
وكمان عدم شرب مياه وعصاير بشكل كافى على مدار اليوم سبب قوى جدا فى تشققات الشفايف
دا غير مطب كتير مننا بيقع فيه وهو انواع مرطبات الشفاه فرغم ان فى انواع غاليه لكن للاسف بتكون ردئيه جدا وبتتسبب فى مشاكل كتيير  علشان كدا يفضل تستشيرى طبيب فى النوع المناسب ليكى او تستغنى عن المرطبات الكميائيه بأخرى محضره فى البيت
وطبعا مش محتاجه اعرفكوا ان التدخين دمار للجسم مش بس للبشره والشفايف .

هقولكوا وصفات تخلصكوا من جفاف وتشققات الشفايف وكمان من اللون الداكن للشفايف وكمان ازاى تعملى سنفره علشان تزيلى القشر والجلد الميت من الشفاه واخيرا وصفه تحفه تديكى لون وردى يدوم 48 ساعه بدون روج 

الواصفات

اول وصفه للتخلص من جفاف وتشققات الشفاه : هى وصفة العسل والفازلين حطى طبقه من العسل الابيض على الشفاه وفوقيها طبقه من الفازلين لتعزيز الترطيب وسيبها من ربع لنص ساعه وبعدين امسحى الشفايف بقطنه
وكمان ممكن تخلطى نص ليمونه مع معلقة زيت خروع مع معلقة جلسرين  وتستخدميه ك ماسك او كمرطب يومى .

تانى وصفه 

عندنا هى للون الداكن للشفايف : قبل النوم حطى طبقه من زيت الزيتون على الشفاه وبعدين حطى طبقه من السكر الناعم  ونامى بيها وبعدين اغسليها اول لما تصحى هتحسى نتيجه من اول مره
كمان لو عملتى مساج يومى للشفايف بالزبادي او بشرايح الخيار هتلاقى اللون الداكن بيقل شويه بشويه لحد ما،يختفى

نيجى بأه للسنفره والتقشير ودا مفيش اسهل منه :عن طريق وضع طبقه سميكه من الفازلين وتركها مدة ربع ساعه وبعدين افركى الشفايف بفرشة اسنان نظيفه هتلاقى الجلد الميت كله نزل وهتحسى بنعومه وطراوه تحفه فى الشفايف 
حاجه اخيره هقولوكوا عليها ويارب تعجبكوا لو عايزه لون طبيعى يدوم معاكى يومين مهما بأه اكلتى او شربتى او غسلتيه حتى حضرى الوصفه دى 

: مبدأيا المكونات 

:بودرة دم غزال او شربات
_فازلين
_جيلاتين
دم الغزال والجيلاتين من عند العطار الى بتتعاملى معاه  الطريقه 

: اخلطى المكونات مع بعض وبعدين حطيها على الشفايف من نص ساعه لساعه وبعدين شيلها وخلى بالك كويس لو مش بتعرفى تظبطى الماسك على الشفايف فقط يفضل وضع شريط لاصق على منطقة حول الفم علشان اللون  اعملى الماسك دا مره كل يومين بعد ماسك السنفره او من غيره  وريحى بالك واستمتعى بلون طبيعى ثابت بدون ملونات الشفاه وعلى فكره ممكن تستخدمى شربات بدل دم الغزال  وكمان ممكن تحطى شربات على الفازلين اثناء السنفره بردو بيدى لون حلو اوى

واه ياريت نعرف كويس ان الوقايه خير من العلاج يعنى بلاش نعرض نفسنا لاشعة الشمس فترات طويله وكمان بلاش طبعا التدخين بانواعه ومهم جدا جدا اننا نشرب مياه وعصاير بكميات كافيه على مدار اليوم كله لمنع جفاف جسمنا وطبعا الاهتمام بالفاكهه والخضار ومفيش مشكله ناخد فيتامينات تحسن من صحتنا  ونقلل شويه من الروجات وملونات الشفايف وممكن جدا تعتمدى على الماسك السابق ذكره وبردو نقلل من الشاى والقهوه ولو هتستخدمى مرطبات للشفايف اختارى نوع كويس وياريت تستشيرى طبيب اولا 

اتمنى اكون قدرت افيدكم بموضوع النهارده ومستنيه ارائكم (ياسمين)